Xəbərlər

Gəncə Dövlət Universitetində “Məzun Günü” keçirilib.

Azərbaycan Respublikasının Dövlət Himninin səsləndirilməsi ilə başlayan tədbirdə Ümummilli Lider Heydər Əliyevin və torpaqlarımızın azadlığı uğrunda şəhid olanların əziz xatirəsi anılıb.

 Tədbirdə Gəncə şəhər İcra Hakimiyyətinin başçısı Niyazi Bayramov, Gəncə Dövlət Universitetinin rektoru Yusif Yusibov, Türkiyə Respublikasının Gəncədəki Baş Konsulu Recep Öztop, Vətən müharibəsi qaziləri, şəhid ailə üzvləri, ali təhsil müəssisəsinin professor-müəllim heyəti, tələbələr və valideynlər iştirak ediblər.

   Universitetin rektoru Yusif Yusibov məzunları təbrik edərək onlara gələcək həyatlarında, peşə fəaliyyətlərində və karyeralarında uğurlar arzulayıb, məzunların universitetdə əldə etdikləri biliklər əsasında yüksəkixtisaslı mütəxəssislər kimi fəaliyyət göstərəcəklərinə əminliyini ifadə edib. Rektor gənclərə milli-mənəvi dəyərlərə sadiq qalaraq Vətənə və xalqa layiqincə xidmət etməyi, həmçinin məzunu olduqları ali təhsil müəssisəsinin nüfuzunu hər zaman qorumalarını və onu uğurla təmsil etmələrini tövsiyə edib. Rektor Yusif Yusibov diqqətə çatdırıb ki, 2025/2026-cı tədris ilində universitetdə ümumilikdə 2000-dən çox tələbə məzun olur. Bir vaxtlar yalnız pedaqoji ixtisaslar üzrə kadr hazırlayan universitetdə hazırda müxtəlif sahələrdə bakalavriat səviyyəsi üzrə 46 ixtisas, magistratura səviyyəsi üzrə isə 23 ixtisas üzrə 64 ixtisaslaşmaya aid kadrlar hazırlanır. Son 10 ildə isə Gəncə Dövlət Universitetində təhsil alan tələbələrin sayı 2 dəfəyə qədər yüksəlib. Çıxışında ölkəmizdə təhsilə və elmə göstərilən dövlət qayğısından danışan rektor Yusif Yusibov universitetin beynəlxalq reytinqlərdə artan nüfuzundan, müasir dövrün tələblərinə cavab verən yüksək ixtisaslı kadr hazırlığından və tələbələr üçün yaradılan imkanlardan söhbət açıb. O da diqqətə çatdırılıb ki, Universitetdə yüksək ixtisaslı pedaqoji və elmi kadrların hazırlanması istiqamətində, tədris prosesinin, elmi-tədqiqat işlərinin təşkilində daim uğurlu işlər həyata keçirilir, professor-müəllim heyətinin və tələbələrin müxtəlif proqramlar çərçivəsində yerli və beynəlxalq layihələrdə iştirakı təmin olunur və dünyanın nüfuzlu ali məktəbləri ilə ikitərəfli əməkdaşlıq əlaqələri uğurla davam etdirilir.

Gəncə şəhər İcra Hakimiyyətinin başçısı Niyazi Bayramov çıxışında məzunlara səmimi ürək sözlərini çatdırıb, Gəncə Dövlət Universitetinin məzunları arasında Azərbaycanın ictimai-siyasi həyatına layiqli töhfələr verən şəxslərin olduğunu bildirib. Ümummilli Lider Heydər Əliyev tərəfindən əsası qoyulmuş, Prezident İlham Əliyev tərəfindən uğurla davam etdirilən dövlət gənclər siyasətinin əhəmiyyətindən bəhs edib.

   Türkiyə Respublikasının Gəncədəki Baş Konsulu Recep Öztop gənclərin təhsil almasının önəmində danışıb, məzunlara gələcək işlərində uğurlar arzu edib.

    Şəhid Elşən Abdullayevin atası Sabir Abdullayev çıxış edərək ali təhsil ocağında yüksək ixtisaslı kadr hazırlığı ilə yanaşı, gənclərin vətənpərvər ruhunda yetişdirilməsinə önəm verən univseritet rəhbərliyinə minnətdarlığını bildirib.

   İqtisadiyyat və idarəetmə fakültəsinin məzunu Tellan Zeynalova çıxışında Gəncə Dövlət Universitetinin məzunu olmaqdan qürur duyduğunu dilə gətirib, tələbələrə göstərilən yüksək diqqət və qayğıya görə universitetin rəhbərliyinə və müəllimlərə minnətdarlığını ifadə edib.

Tədbirdə təhsildə göstərdikləri yüksək nəticələrə və ictimai işlərdə fəal iştiraka görə bir qrup məzuna Fəxri fərman təqdim olunub.

  “Məzun Günü” konsert proqramı ilə davam edib və möhtəşəm atəşfəşanlıqla başa çatıb.

Gəncə Dövlət Universitetində bədii yaradıcılıq festivalının baxış müsabiqəsi keçirilib

Gəncə Dövlət Universitetində (GDU) Ümummilli Lider Heydər Əliyevin anadan olmasının 103 illiyinə həsr olunmuş bədii yaradıcılıq festivalının baxış müsabiqəsi keçirilib.

Azərbaycan Respublikası Elm və Təhsil Nazirliyi və Elm vəTəhsil İşçiləri Həmkarlar İttifaqı Respublika Komitəsinin  hər il gənclər arasında birgə təşkil etdiyi  müsabiqə-festivalın məqsədi tələbələri mədəniyyətimizə, tariximizə, incəsənətimizə, milli   adət-ənənələrimizə hörmət ruhunda yetişdirmək, istedadlı gəncləri üzə çıxarmaq və onların qabiliyyətlərinin inkişafına dəstək olmaqdır.

Gəncə Dövlət Universitetində keçirilən yaradıcılıq festivalının baxış müsabiqəsində təşkilat komitəsinin məsul nümayəndələri və münsiflər heyətinin üzvləri – xalq artisti Samir Cəfərov, Bakı Xoreoqrafiya Akademiyasının prorektoru, xalq artisti Təranə Muradova, Azərbaycan Respublikasının əməkdar incəsənət xadimi Baba Vəziroğlu, Qarabağ Universitetinin İncəsənət fakültəsinin İnsturmental ifaçılıq və musiqi müəllimliyi kafedrasının müdiri Arslan Növrəsli, əməkdar artist Rəşad Haşımov iştirak ediblər.

Rektorun baş müşaviri Asif Cavadov  çıxış edərək müsabiqə festivalının əhəmiyyətindən və gənclər üçün yaradılan şəraitdən danışıb.

   Çıxışlardan sonra GDU-nun Tələbə Həmkarlar İttifaqı Komitəsinin sədri Pərviz Adıgözəlovun və Musiqi fənləri kafedrasının müdiri Sevda Qurbanəliyevanın təşkilatçılığı ilə hazırlanan zəngin konsert proqramında tələbələr ifasında səsləndirilən vokal, instrumental, xor ifaçılığı, bədii qiraət, aşıq havaları, eləcə də xalq mahnıları maraqla qarşılanıb.

  Münsiflər heyəti təqdim olunan çıxışları yüksək qiymətləndirib, gənclərin hərtərəfli inkişafı üçün yaradılan əlverişli şəraitə, göstərilən diqqət və qayğıya görə Universitet rəhbərliyinə dərin təşəkkürünü bildiriblər.

Yaradıcılıq festivalının baxış müsabiqəsində istedadı ilə seçilən tələbələr Bakıda keçiriləcək yekun konsertdə iştirak etmək hüququ qazanıblar.

GDU-da “Səməni” festifalı

Gəncə Dövlət Universitetində Kimya və biologiya fakültəsinin və Tələbə Həmkarlar İttifaqı Komitəsinin təşkilatçılığı ilə Novruz bayramı münasibətilə “Səməni” festivalı keçirilib. Festivalda Novruz bayramının atributlarını və milli adət-ənənələrimizi özündə əks etdirən bayram xonçaları nümayiş olunub. Tələbələrin maraqlı əl işləri, səmənilər, eləcə də qədimi əşyaların nümayişi, tələbələrin milli rəqsləri və bayram tonqalı festifalı daha da maraqlı edib. 

Gəncə Dövlət Universitetinin rektoru Yusif Yusibov tədbir iştirakçılarını qarşıdan gələn Novruz və Ramazan bayramı münasibəti ilə təbrik edib, ən xoş arzularını çatdırıb. Bildirib ki, qədim köklərə malik Novruz bayramının kütləvi el şənlikləri və mərasimlərlə dövlət səviyyəsində keçirilməsi, yurdumuzun hər bir guşəsində coşqu ilə qeyd olunması milli müstəqilliyimizin bizə bəxş etdiyi nailiyyətlərindəndir və tarixi-milli irsimizə bağlılığımızın parlaq təzahürlərindəndir. Universitetdə keçirilən “Səməni” festifalı da milli adət-ənənələrimizi, dəyərlərimizi yaşatmaq və gənclərə ötürmək məqsədi daşıyır.

 Novruz bayramının personajları sayılan Keçəl və Kosanın əyləncəli tamaşaları və konsert proqramı hər kəsə xoş ovqat bəxş edib. Sonda Gəncə Dövlət Universitetinin əməkdaşlarından ibarət münsiflər heyəti tərəfindən festifalın qalibləri müəyyən edilərək ən yaxşı 4 komandaya mükafatın verilməsi qərara alınıb.

Gəncə Dövlət Universitetində 5 Mart – Bədən Tərbiyəsi və İdman Gününə həsr olunmuş tədbir keçirilib

 Azərbaycan Respublikasının Dövlət Himninin səsləndirilməsi ilə başlayan tədbirdə torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

Daha sonra idman sahəsində əldə edilən uğurlara həsr olunmuş videoçarx nümayiş etdirilib.

 Rektorun baş müşaviri Asif Cavadov tədbiri giriş sözü ilə açaraq bildirib ki, Azərbaycan idmanın geniş vüsətlə inkişafı Ümummilli Lider Heydər Əliyevin adı ilə bağlıdır. Ulu Öndərin ölkəmizə hələ birinci rəhbərliyi dövründə digər sahələrə olduğu kimi, idmanın da inkişafına böyük diqqətlə yanaşılmış, gələcək inkişaf perspektivləri ciddi nəzərə alınaraq maddi-texniki bazanın yaradılması üçün böyük işlər görülmüşdü. Prezident İlham Əliyevin uğurlu idman siyasəti nəticəsində artıq Azərbaycan dünyanın qabaqcıl idman ölkəsinə çevrilib. Bu sahədə həyata keçirilən ardıcıl tədbirlər, idmançılara göstərilən diqqət və qayğı, ölkəmizdə ən yüksək standartlara cavab verən mükəmməl idman infrastrukturu qarşıdakı illərdə daha böyük uğurların əldə olunacağına güclü zəmin yaradır.

Tədbirin sonunda bir qrup universitet əməkdaşı və tələbələr idman sahəsində əldə etdikləri nailiyyətlərə görə fəxri fərman, kubok və medal ilə təltif olunublar.

Gəncə Dövlət Universitetinin tələbələri “Həmkarlar İttifaqı təqaüdü”nə layiq görülüblər

3 mart 2026-cı il tarixdə Azərbaycan Həmkarlar İttifaqları Konfederasiyasının (AHİK) üzv təşkilatı Elm və Təhsil İşçiləri Həmkarlar İttifaqı Respublika Komitəsi (ETİHİ RK) 250 tələbəyə “Həmkarlar ittifaqı təqaüdü” təqdim edib.

2024/2025-ci tədris ilində yüksək akademik göstəriciləri və ictimai fəallığı ilə seçilən Gəncə Dövlət Universitetinin 5 tələbəsi də “Həmkarlar İttifaqı təqaüdü”nə layiq görülüb.

Təqdimetmə mərasimində çıxış edənlər diqqətə çatdırıblar ki, layihə tələbələr arasında elmə marağın artırılması, sosial fəallığın gücləndirilməsi və həmkarlar ittifaqı dəyərlərinin təşviq olunması baxımından mühüm əhəmiyyət daşıyır. Bu təşəbbüs təhsildə yüksək akademik nəticələr göstərən, ictimai fəallığı, təşkilatçılıq bacarığı və həmkarlar ittifaqı hərəkatında aktiv mövqeyi ilə seçilən tələbələrin stimullaşdırılmasına xidmət edir. Akademik göstəriciləri yüksək olan və tələbə həmkarlar ittifaqı hərəkatında fəal iştirak edən gənclər üçün nəzərdə tutulan “Həmkarlar ittifaqı təqaüdü” proqramı uğurlu təşəbbüslərdən biridir.

GDU-nun tələbələri IV Aqrar Startaplar və İnnovasiya Forumunda fəal iştirakına görə sertifikata layiq görüldülər

GDU-nun tələbələri IV Aqrar Startaplar və İnnovasiya Forumunda fəal iştirakına görə sertifikata layiq görüldülər

Kənd Təsərrüfatı Nazirliyinin Aqrar İnnovasiya Mərkəzi və ADA Universitetinin birgə təşkilatçılığı ilə IV Aqrar Startaplar və İnnovasiya Forumu keçirilib. Forum ADA Universitetinin nəzdində fəaliyyət göstərən İtaliya-Azərbaycan Universitetində baş tutub.

Forumda dövlət qurumlarının nümayəndələri, ali təhsil müəssisələrinin rəhbərləri, akselerasiya və inkubasiya mərkəzlərinin təmsilçiləri, investorlar, aqrar startapçılar, kənd təsərrüfatı sahəsində ixtisaslaşmış şirkətlər iştirak ediblər. Gəncə Dövlət Universitetini İnnovasiya texnologiyalarının transferi və marketinqi şöbəsinin müdiri Razim Əliyev, şöbənin əməkdaşı Kamran Yusibov, Kimya və biologiya fakültəsinin tələbələri İsfəndiyar Aslanov və Zeynəb Nağıyeva təmsil ediblər.

IV Aqrar Startaplar və İnnovasiya Forumunda aqrar startapçıların, akselerasiya və inkubasiya mərkəzlərinin, eləcə də özəl sektor nümayəndələrinin təqdim etdiyi innovativ həll və texnologiya nümunələri sərgilənib.

Gəncə Dövlət Universitetinin Kimya və biologiya fakültəsinin tələbələri İsfəndiyar Aslanov və Zeynəb Nağıyeva öz startap layihələrini təqdim ediblər. Tələbələrimiz forumda fəal iştirakına görə sertifikata layiq görülüblər.

Kimya və biologiya fakültəsinin tələbəsi İsfəndiyar Aslanov Tələbə Həmkarlar İttifaqı Komitəsinin fəalıdır. İsfəndiyar Aslanov Elm və Təhsil İşçiləri Həmkarlar İttifaqı Respublika Komitəsinin Həmkar təqaüdünə layiq görülmüş tələbədir

Gəncə Dövlət Universitetində 2 Fevral – Gənclər Günü münasibətilə tədbir keçirilib

Azərbaycan Respublikasının Dövlət Himninin səsləndirilməsi ilə başlayan tədbirdə şəhidlərimizin xatirəsi bir dəqiqəlik sükutla yad edilib.

Daha sonra gənclərə həsr edilən videoçarx nümayiş olunub.

 Universitetin Humanitar məsələlər üzrə prorektoru Gülsüm Fətəliyeva çıxış edərək ölkəmizdə Gənclər Gününün qeyd edilməsinin tarixindən, gənclərin aparıcı qüvvə kimi formalaşmasında dövlət gənclər siyasətinin əhəmiyyətindən danışıb. Bildirib ki, məhz Ümummilli Lider Heydər Əliyevin müdrikliyi və uzaqgörən siyasəti sayəsində gənclərin sosial, iqtisadi, təhsil və digər problemlərinin həllinə yönəlmiş fərman və sərəncamlar, dövlət proqramları qəbul edilib. Əsası Ulu Öndər Heydər Əliyev tərəfindən qoyulan gənclər siyasəti bu gün Azərbaycan Respublikasının Prezidenti Cənab İlham Əliyev tərəfindən uğurla davam etdirilir. Azərbaycan gəncliyi ölkənin iqtisadi və intellektual gücünün aparıcı qüvvəsidir.

 GDU Tələbə Həmkarlar İttifaqı Komitəsinin sədri Pərviz Adıgözəlov vurğulayıb ki, Prezident İlham Əliyev tərəfindən gənclər siyasətinin  uğurla davam  etdirilməsi  gənclərdə böyük ruh yüksəkliyi və işıqlı sabahımıza dərin inam yaradır. 

Tədbirdə təhsildə və ictimai işlərdə fərqlənən GDU-nun bir qrup tələbəsinə Fəxri fərman təqdim edilib.

Tələbələr onlara göstərilən diqqətə görə Gəncə Dövlət Universitetinin rektoru Yusif Yusibova minnətdarlıqlarını bildiriblər.

GDU-da iki fakültənin THİK sədri “Yeni bir fikrim var-2” müsabiqəsinin qalibi olub.

Gəncə Dövlət Universitetində İnnovasiya Departamentinin təşkilatçılığı ilə keçirilən “Yeni bir fikrim var 2” layihə müsabiqəsinin final mərhələsi başa çatmışdır.

Müsabiqədə iştirak edən tələbələr arasında 2-ci yerin qalibi universitetimizin iki THİK sədrindən ibarət «SADA» komandası olmuşdur: Məmmədova Sevgi – Xarici Dillər fakültəsinin THİK sədri və İsgəndərova Şəfiqə – Kimya-Biologiya fakültəsinin THİK sədri.

Komanda tərəfindən təqdim edilən layihə 38 ideya arasından seçilərək yüksək nəticə göstərmiş və Sertifikat + 500 AZN mükafatla təltif olunmuşdur.

Gəncə Dövlət Universiteti Tələbə Həmkarlar İttifaqı Komitəsi olaraq sədrlərimizi göstərdikləri təşəbbüskarlığa, innovativ düşüncəyə və uğurlu nümayəndəliyə görə təbrik edirik!

“Xarici dillərin tədrisi və tərcüməsində müasir yanaşmalar” adlı tələbə elmi konfrans

Gəncə Dövlət Universitetinin Xarici dillər fakültəsində Tələbə Elmi Cəmiyyəti və Tələbə Həmkarlar İttifaqı Komitəsinin təşkilatçılığı ilə “Xarici dillərin tədrisində və tərcüməsində müasir yanaşmalar və innovativ perspektivlər” mövzusunda tələbə elmi konfrans keçirilib.

Rəsmi açılış mərasimində Gəncə Dövlət Universitetinin Elm və innovasiyalar üzrə prorektoru, millət vəkili Pərvin Kərimzadə çıxış edərək bildirib ki, konfrans universitetdə tələbələrin elmi araşdırmalara cəlb olunmasını təşviq etmək, müasir yanaşmaların tədris prosesinə inteqrasiyasını dəstəkləmək və gənc tədqiqatçılar üçün müzakirə platforması yaratmaq baxımından mühüm əhəmiyyət daşıyır.

Elmi konfransda universitetin Tələbə Həmkarlar İttifaqı Komitəsinin sədri Pərviz Adıgözəlov, Xarici dillər fakültəsnin dekanı Əjdər Ələsgərov, GDU Tələbə Elmi Cəmiyyətinin sədri Lalə Ələkbərova çıxış edərək tədris, elm, innovasiya və tələbə fəaliyyətinin qarşılıqlı inteqrasiyası, yeni tədris mühitlərinin formalaşdırılması, eləcə də tərcümə sahəsində qlobal çağırışlara adaptasiya kimi məsələlərdən danışıblar.

Süni intellektin dil öyrənmə və tərcümə proseslərinə təsiri, tərcümə sahəsində bədii mətnlərin tərcümə problemləri, tədrisin fərdiləşdirilməsi və rəqəmsal analitika kimi mövzular müzakirə olunub.

Rəsmi hissədən sonra məqalə müəllifləri öz tədqiqat işlərini təqdim ediblər, münsiflər heyətinin qiymətləndirməsi nəticəsində ən yaxşı dörd iştirakçı mükafatlandırılıb, eləcə də konfransa məqalə təqdim edən 26 tələbəyə sertifikatlar təqdim olunub.

GDU-da idman turnirinin açılışı olub

Gəncə Dövlət Universitetində “Konstitusiya və Suverenlik İli”nə həsr edilimiş “Vətənin müdafiəsinə hazıram” adlı idman turnirinin açılışı olub.

Azərbaycan Respublikasının Dövlət Himninin səsləndirilməsi ilə başlayan tədbirdə torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib..

Tədbirin rəsmi hissəsində universitetin rektoru Yusif Yusibov çıxış edərək bildirib ki, 2025-ci ilin ölkəmizdə “Konstitusiya və Suverenlik İli” elan olunması tarixi əhəmiyyət kəsb edir. Azərbaycan dövləti Konstitusiyanın tələblərinə və öz suveren hüquqlarına əsaslanaraq, qarşıda duran strateji hədəflərə doğru inamla irəliləyir. Azərbaycan Respublikasının Prezidenti, Ali Baş Komandan İlham Əliyevin rəhbərliyi, şanlı ordumuzun şücaəti ilə əldə edilən böyük Qələbə dövlətimizin ərazi suverenliyini tam bərpa etməklə yanaşı, dayanıqlı inkişaf üçün möhkəm zəmin yaradıb. Şanlı Zəfərimiz sayəsində bu gün Azərbaycanın Dövlət Bayrağı suverenliyimizin bərqərar olduğu bütün ərazilərimizdə əzəmətlə dalğalanır. Rektor dövlətimiz tərəfindən idmana və idmançılarımıza göstərilən qayğıdan danışıb, eləcə də universitetin idman sahəsində əldə olunan uğurlarından bəhs edib. Bildirib ki, Gəncə Dövlət Universitetində idman yarışlarının keçirilməsi, xüsusən tələbələrin yerli və beynəlxalq yarışlarda mühüm nailiyyətlər qazanmaları gənc nəslin vətənpərvərlik ruhunu daha da yüksəldir. Bu isə gənclərin sağlam ruhda tərbiyəsində, idmanın kütləviləşməsində mühüm rol oynayır.

Millət vəkili, Gəncə Dövlət Universitetinin Elm və İnnovasiyalar üzrə prorektoru Pərvin Kərimzadə çıxış edərək Azərbaycanda 2025-ci ilin “Konstitusiya və Suverenlik ili”nin elan olunmasının əhəmiyyətindən və dövlətçiliyimizin hüquqi əsaslarının formalaşmasında Konstitusiyanın rolundan bəhs edib. Qeyd edib ki, 12 noyabr 1995-ci ildə qəbul edilən müstəqil Azərbaycan Respublikasının ilk Konstitusiyası ölkəmizin gələcək inkişaf yolunu müəyyənləşdirərək hüquqi demokratik dövlət quruculuğunun əsasını qoydu. Bununla da hüquqi və dünyəvi dövlətin əsasları formalaşdırıldı. Millət vəkili Pərvin Kərimzadə çıxışında universitetdə mütəmadi olaraq idman yarışlarının keçirilməsinə göstərdiyi dəstəyə görə rektor Yusif Yusibova təşəkkürünü bildirib.

 Gəncə-Daşkəsən Regional Gənclər və İdman İdarəsinin rəisi Elvin Quliyev gənc nəslin təlim-tərbiyəsində və idmana marağın artırılmasında belə yarışların əhəmiyyətindən bəhs edib.   

 Tədbirin davamında GDU-nun idmançıları ayrı-ayrı idman növləri üzrə nümunəvi çıxışlar ediblər.

 Bədii hissədə Pedaqoji fakültənin Musiqi müəllimliyi ixtisasının tələbələri vətənpərvərliyə aid mahnılar oxuyublar.

 Bildirək ki, Gəncə Dövlət Universitetinin İdman Klubu, Tələbə Həmkarlar İttifaqı Komitəsi və Tələbə Gənclər Təşkilatının təşkilatçılığı ilə baş tutan idman turniri şahmat, voleybol, dama, futbol, stolüstü tennis və güllə atıcılığı üzrə keçirilir. İdman turniri bir ay davam edəcək.

SABAH qrupları layihəsi çərçivəsində Gəncə Dövlət Milli Dram Teatrında tamaşa nümayiş olunub

Elm və Ali Təhsil üzrə Dövlət Agentliyinin SABAH qrupları layihəsi tərəfindən təşkil olunan Sabah İncəsət Festivalı çərçivəsində “Yay gecəsində yuxu” adlı tamaşa Gəncə Dövlət Milli Dram Teatrının səhnəsində nümayiş olunub. Tədbir Gəncə Dövlət Universitetinin dəstəyi ilə baş tutub.

Azərbaycan Dövlət Mədəniyyət və İncəsənət Universitetinin (ADMİU) Aktyor sənəti ixtisasının tələbələri Vilyam Şekspirin məşhur əsəri əsasında hazırladıqları tamaşa ilə səhnədə çıxış ediblər. Tamaşa izləyicilər tərəfindən böyük maraqla qarşılanıb.Tədbirdə Gəncə Dövlət Universiteti Tələbə Həmkarlar İttifaqı Komitəsinin fəalları da iştirak etmişdir.

Sonda millət vəkili, Gəncə Dövlət Universitetinin Elm və İnnovasiyalar üzrə prorektoru Pərvin Kərimzadə çıxış edərək SABAH İncəsənət Festivalı çərçivəsində həyata keçirilən tədbirlərin incəsənət mühitinin canlandırılması, teatr sənətinin inkişafı, teatr mədəniyyətinin formalaşdırılması, həmçinin yaradıcı gənclərin dəstəklənməsinə mühüm töhfə verdiyini bildirib.

GDU-nun tələbəsi Fatimə Mehdiyeva İslam Həmrəyliyi Oyunlarında medal qazandı

Səudiyyə Ərəbistanının paytaxtı Ər-Riyadda keçirilən VI İslam Həmrəyliyi Oyunlarında boksçuların mübarizəsinə yekun vurulub. Azərbaycan millisi yarışı 1 qızıl, 3 gümüş və 2 bürünc medalla başa vurub.

Gəncə Dövlət Universitetinin tələbəsi də İslam Həmrəliyi Oyunlarında medal qazananlar sırasındadır. Belə ki, Pedaqoji fakültənin Məşqçilik ixtisasının 2-ci kurs tələbəsi, Fatimə Mehdiyeva 3-cü yerə layiq görülüb. Tələbəmiz Fatimə Mehdiyeva VI İslam Həmrəyliyi Oyunlarında boks üzrə yarışlarda bürünc medal qazanıb.

Qeyd edək ki, Fatimə Mehdiyeva 23, 29 noyabr 2025-ci il tarixlərdə Macarıstanda keçiriləcək Avropa Çempionatında Azərbaycan milli komandasında iştirak etmək hüququ qazanıb.